"ആദ്യം കമന്റ് തരൂ.. പോസ്റ്റ് ഞാന്‍ പിന്നെയിടാം !!"

"കമന്റും ഫോള്ളോവേഴ്സും വാരിക്കോരി തന്ന് എന്നെ ബ്ലോഗ്ഗിലെ ഒരു പുലിയാക്കൂ..!

പോസ്റ്റുകളോ?..ങാ.. അതൊക്കെ ഞാന്‍ വഴിയേ ഇട്ടോളാം!"

ഈയ്യൊരു നിലപാടാണെന്നു തോന്നുന്നു നമ്മുടെ പല പുതിയ ബ്ലോഗ്ഗേഴ്സിനും.

സമീപകാലത്ത് ബൂലോകത്തില്‍ പ്രത്യക്ഷപ്പെട്ട പല (നവ) ബ്ലോഗ്ഗര്‍മാരുടെയും പോസ്റ്റുകളില്‍ "കമന്റാര്‍ത്തിയ ഫോല്ലോവേഴ്സ് മാനിയ " അസുഖം വല്ലാതെ പടര്‍ന്നു പിടിച്ചിരിക്കുന്നതായി കാണുന്നു. പലവട്ടം ചര്‍ച്ച ചെയ്ത വിഷയമാണങ്കില്‍ കൂടി ചിന്ന ബ്ലോഗ്ഗേഴ്സ് തൊട്ട് മിക്കവരിലും ഇത് ഉയര്‍ന്നതോതില്‍ കാണുന്നതിനാല്‍ ഈ അസുഖം ബാധിച്ച മുന്‍ രോഗി എന്ന നിലയില്‍ ഈ അസുഖത്തെക്കുറിച്ച് രണ്ടുവാക്ക് ഞാന്‍ ഇവിടെ പറയട്ടെ..

(ഫ!..മിണ്ടിപ്പോകരുത്!)

മലയാളം ബൂലോകത്ത് സര്‍ഗ്ഗധനരരായ ബ്ലോഗ്ഗേഴിസിന്റെ കൊഴിഞ്ഞ് പോക്കുണ്ടാകുകയും മലയാളം ബ്ലോഗ്ഗിംഗ് തന്നെ വിനയന്റെ യക്ഷിയെ പ്പോലെ തിയേറ്ററു കിട്ടാതലയുകയും ചെയ്ത ഒരു കാലഘട്ടമാണല്ലോ കഴിഞ്ഞു പോയത്..

(ങേ? അങ്ങനൊരു സംഭവം നടന്നോ..ഞങ്ങളറിഞ്ഞില്ലല്ലോ !)

കൃത്യമായി പറഞ്ഞാല്‍ ആറേഴുമാസം മുന്‍പ് "എന്റെ വര"യുടെ വരവോടെയാണു ഈ രംഗം വീണ്ടും സജീവമായത് എന്ന് പറഞ്ഞാല്‍ വിശ്വസിക്കേണ്ടി വരും..

കാരണം അന്തവും കുന്തവും ഇല്ലാത്ത വിവരദോഷിയായ് ഈയുള്ളവനു വരേ ഒരു ബ്ലോഗ്ഗ് തുടങ്ങാമെങ്കില്‍ പിന്നെ എന്തുകൊണ്ട് നമുക്ക് തുടങ്ങിക്കൂടാ എന്ന് ചിന്തിച്ചു കൊണ്ടാണു (തങ്ങളുടെ കയ്യില്‍ എന്താണു ആയുധമുള്ളത് എന്നു പോലും നോക്കാതെ) പല നവ ബ്ലോഗ്ഗേഴ്സും ഈ കൂലം കുത്തിയൊഴുകുന്ന ബൂലോകനദിയിലേക്ക് എടുത്ത് ചാടിയത്...

ഒടുവില്‍ ഒരു കച്ചിത്തുരുമ്പായി പോലും ഒരു കമന്റു കിട്ടാതെ പലരും ബൂലോകനദിയില്‍ മുങ്ങിപ്പോയി..

മലയാളം നേരേചൊവ്വേ എഴുതാനറിയാത്ത എന്നെപ്പോലുള്ളവര്‍ (ഓക്സ് ഫോര്‍ഡില്‍ പഠിച്ചതിന്റെ ദോഷം!) ബ്ലോഗ്ഗിംഗ് തുടങ്ങിയതിന്റെ പരിണിത

ഫലമോ..ശ്രീ.ഞാന്‍ തന്നെ പണ്ട് തെണ്ടി നടന്ന അനുഭവം പലര്‍ക്കുമുണ്ടായി...

അന്നങ്ങനെ തെണ്ടിയതിന്റെ സീനിയോറിറ്റി എനിക്കവകാശപ്പെട്ടതിനാലാണു ഈ കമന്റാര്‍ത്തിയ രോഗത്തെക്കുറിച്ച് എനിക്ക് ഒരിക്കല്‍ കൂടി പറയേണ്ടി വരുന്നത്..

(പുതുമുഖ ബ്ലോഗ്ഗേഴ്സ് ശ്രദ്ധിച്ചു കേട്ടോണം ..ങാഹ )

എന്താണു കമന്റ് ?

അല്ല എന്താണുകമന്റ്?

അതു ഇവിടെ ചിലര്‍ പറഞ്ഞ പോലെ നീ എനിക്കു ചൊറിഞ്ഞു താ ഞാന്‍ നിനക്കും ചൊറിഞ്ഞു തരാം എന്ന നിലപാടാണോ..?

അതോ നീയെന്നെ പുകഴ്ത്തൂ ഞാന്‍ നിന്നേയും പുകഴ്ത്താം എന്ന പരസ്പരമുള്ള സുഖിപ്പിക്കലാണോ..?

പെണ്ണുങ്ങളുടെ പ്രൊഫൈല്‍ ചിത്രമുള്ള ബ്ലോഗ്ഗില്‍ പോയി ഹോ! കിടിലന്‍! സൂപ്പര്‍! എന്നൊക്കെ പറഞ്ഞ് വായീ നോക്കി നില്‍ക്കലാണോ..?

അതോ യുക്തിവാദത്തിന്റെ,മതപരമായ സമകാലിക ചര്‍ച്ചകളില്‍ സംസ്ക്കാര ശൂന്യമായ് ഭാഷ ഉപയോഗിക്കലോ..?

അജ്ഞാതയായി വന്ന് വിഷലിപ്ത വാക്കുകള്‍ വിസര്‍ജ്ജിക്കലോ..?

അതു കൂതറ ഹാഷിമിനു മുഖം നോക്കാതെ മനസ്സിലുള്ളത് പറയാനുള്ള ഒന്നാണെങ്കില്‍

യോജിച്ചാലും ഇല്ലെങ്കിലും ചിത്രകാരനു അതു വാളിനേക്കാള്‍ മൂര്‍ച്ചയുള്ള ഒരായുധമാണു.

എന്നാല്‍ പള്ളിക്കരക്കത് കാവ്യാത്മകമായി പ്രതികരണമറിയിക്കാനുള്ള ഒരുപാധിയാണ്.

സുരേഷ് മാഷിനോ വസ്തുനിഷ്ഠമായ സാഹിത്യ നിരൂപണത്തിനുള്ള ഒരു കാപ്സ്യൂള്‍ പ്രതിവിധിയും.

ഉമേഷിനത് തന്റെ കുഞ്ഞി കവിതകള്‍ പോലെ ശാന്തനായി ഒരു സ്മൈലി ഇട്ട് പോവാനുള്ള ഇടവും.

മുഖ്താറിനു അഭിപ്രായത്തോടൊപ്പം പുഴക്കരയിലെ പഴയ ഹായ് പൂയ് കൂയ് തോണിക്കു വിളി സ്മരണകള്‍ ഉണര്‍ത്താനുള്ള അസുലഭ മുഹൂര്‍ത്തമാണു...

പട്ടേപ്പാടം റാംജിക്കത് വലുപ്പച്ചെറുപ്പമില്ലാതെ പ്രോല്‍സാഹനം നല്‍കാനുള്ള മാര്‍ഗ്ഗവും.

സിബു നൂറനാടും നൗഷുവും എപ്പോഴും സ്നേഹപൂര്‍ണ്ണമായി മിതമായ വാക്കുകളിലൂടെ ബ്ലോഗ്ഗര്‍ക്ക് പ്രോല്‍സാഹനം നല്‍കുമ്പോള്‍ പ്രണയഗീതം സ്പെഷ്യലിസ്റ്റ് ക്രോണിക്ക് ജിഷാദും (ഈയ്യിടെ ഒരു പെണ്ണുവേണം എന്ന് കവിതയെഴുതിയതിനു ഭാര്യ നിയ യുടെ കയ്യില്‍ നിന്നും പള്ളക്കിടി കിട്ടി പുള്ളി കിടപ്പിലാണു..നിയ കരാട്ടേ പഠിച്ചിരുന്നത് ജിഷാദിനോട് പറയാന്‍ മറന്നിരുന്നുവത്രേ..) ഏറക്കാടനും കവി മനാഫ് സാഹിബും സോപ്പ് ചീപ്പ് കണ്ണാടി വില്പ്പനക്കാരന്‍ ഒ.ഐ.ബി യും വഷളനല്ലാത്ത വഷളന്‍ ചേട്ടനും (പുതിയ പേരു വഷളന്‍ ജേക്കെ)ബൂലോകത്തെ നിരാശകാമുകയൂണീയന്‍ പ്രസിഡന്റ്(പയ്യന്‍സ്) നിരാശ കാമുകനുമൊക്കെ സജീവമായി രംഗത്തുണ്ട് കമന്റുകളുമായി.

ഒപ്പം ഉമ്മു അമ്മാര്‍,വായാടി,സിനു,ഗീത,ആഥില,കൊലുസ് തുടങ്ങി ബ്ലോഗ്ഗിണികളുടെ ഒരു നീണ്ട നിര തന്നെ

വസ്തുനിഷ്ഠമായ കമന്റുകളും അപഗ്രഥനവുമായി ചുറ്റുവട്ടത്തൊക്കെയുണ്ട്..

(ആഥിലയും ഉമ്മു അമ്മാറും വായാടിയുമൊക്കെ വ്യക്തവും ദീര്‍ഘവുമായി തന്നെ രചനയുടെ ഉള്‍ക്കാമ്പറിഞ്ഞു കൊണ്ടുള്ള നിരൂപണമാണു പലപ്പോഴും നടത്തുന്നത് എന്ന കാര്യം ശ്രദ്ധേയമാണു..പോസ്റ്റിനേക്കാള്‍ കൂടുതല്‍ വരികളില്‍ അവര്‍ കുത്തിയിരുന്ന് മലയാളം കമ്പോസ് ചെയ്ത് കമന്റ് ഇടുമ്പോള്‍ അത് പരസ്പരമുള്ള ചൊറിയല്‍ /സുഖിപ്പിക്കല്‍ ആണെന്ന് ആരെങ്കിലും പറഞ്ഞാല്‍ അവരെ തല്ലണം!)

ഒപ്പം മുഹമ്മദ് കുട്ടി സാഹിബിനും ബിലാത്തിപ്പട്ടണം ചേട്ടനും സാദിഖ് ഭായിക്കും തെച്ചിക്കോടനും പ്രസിദ്ധിയുടെ തണലിലിരിക്കും ഇസ്മയിലിനുമൊക്കെ ക്രിയേറ്റീവായ പ്രവര്‍ത്തനം തന്നെയാണു കമന്റ് എഴുതല്‍..അതൊരിക്കലും ഓ..എന്നാ പിന്നെ അവനെയങ്ങ് സുഖിപ്പിച്ച് കളയാം എന്നരീതിയില്‍ എഴുതിയതാണെന്ന് എനിക്കിതുവരേ തോന്നിയിട്ടില്ല..

കമന്റുകള്‍ പലപ്പോഴും പുതിയ എഴുത്തുകാര്‍ക്ക് വളരെയധികം പ്രോല്‍സാഹനം നല്‍കുന്നു എന്ന കാര്യത്തില്‍ തര്‍ക്കമില്ല. അതിനു പരസ്പരം സുഖിപ്പിക്കലിന്റെയോ പുറം ചൊറിയലിന്റേയോ പരിഹാസ ലേബല്‍ ചാര്‍ത്തിക്കൊടുക്കേണ്ട കാര്യമുണ്ടെന്ന് തോന്നുന്നില്ല.

ഈ വിഷയത്തെക്കുറിച്ച് ഈ പൊസ്റ്റെഴുതുവാന്‍ വേണ്ടി മലയാളത്തിലെ പല ബ്ലോഗ്ഗുകളും കയറിയിറങ്ങിയപ്പോള്‍ പല നല്ല രചനകള്‍ ഉള്ള ബ്ലോഗ്ഗുകളും ആള്‍താമസമില്ലാതെ.. ഒച്ചയും അനക്കവുമില്ലാതെ ഒഴിഞ്ഞ് കിടക്കുന്നതാണു കണ്ടത്.

നര്‍മ്മത്തിനും സിനിമാവിശേഷങ്ങള്‍ക്കും നിരൂപണത്തിനും പ്രതികരണത്തിനുമൊക്കെ അത്യാവശ്യം ചലനമുണ്ടാക്കാന്‍ കഴിയുമ്പോള്‍ രാഷ്ട്രീയം മതം,യുക്തിവാദം തുടങ്ങിയ മേഘലകളിലാണു സജീവമായ ചര്‍ച്ചകള്‍ നടക്കുന്നത്.

ഈയ്യിടെ ബെര്‍ലിയുടെ ബ്ലോഗ്ഗില്‍ ഐ.ടി.ബുജികളുടെ കൊല്ലും കൊലവിളിയും കൊണ്ട് ഭയങ്കര ഒച്ചയും ബളഹവുമായിരുന്നു..പോക്കിരി രാജയെ തിരിച്ചു വിളിച്ചതും മമ്മൂട്ടിയെ പൊക്കിവെക്കാന്‍ നോക്കിയതും( അങ്ങേരെ ഇനി ഓസ്ക്കാറിലേക്കെല്ലാതെ എങ്ങോട്ടു പൊക്കാന്‍!)

ഐ.ടി -പോളിടെക്നിക്ക് - ഇന്ത്യന്‍ രൂപ പോസ്റ്റിട്ടതു മൂലമൊക്കെ അച്ചായന്‍ കുറച്ചധികം വെള്ളം കുടിച്ചുവെന്നത് സത്യം.

ബെര്‍ലിയുടെ പുതിയ പോസ്റ്റുകള്‍ക്ക് പഴയ പോലെ വായനക്കാരെ ആകര്‍ഷിക്കുവാന്‍ കഴിയുന്നില്ല എന്ന പരാതി വേറേയും!.പിന്നെ ദിവസവും പൊസ്റ്റിടണം എന്നു നേര്‍ച്ചയുള്ള പോലെ പുള്ളി വഴിയേ പോകുന്ന ഏതു വിഷയവും ഒന്നു ബ്ലോഗ്ഗിയിട്ടു വിടുന്നത് കൊണ്ടാണോ

എന്തോ എഴുതിയത് അച്ചായനു രണ്ടാമത് ഒന്നു വായിക്കാന്‍ ഉള്ള സമയം പോലും കിട്ടുന്നില്ല എന്ന് തോന്നും പല പോസ്റ്റും കണ്ടാല്‍.

(പുള്ളിയുടെ രചനാ പാടവത്തിനു മുന്‍പില്‍ ഈ യുള്ളവന്റെ ഒരു നൂറു സലാം..അതു വേറെ കാര്യം !)

ബൂലോകത്ത് കാര്യമായ ചര്‍ച്ച നടക്കുന്ന സ്ഥലങ്ങളില്‍ ഒന്ന് ബഷീര്‍ക്കാന്റെ വള്ളിക്കുന്നിലാണെന്ന് തോന്നുന്നു.

വാദവും പ്രതിവാദവുമായി അവിടം ഓരോ പോസ്റ്റിനും സജീവ ചര്‍ച്ചാവേദികളാണു ഒരുക്കുന്നത്...ഒപ്പം

പ്രവാസഭൂമിയില്‍ തിരിച്ചെത്തിയ അലി ഈയ്യിടെ ബ്ലോഗ്ഗിലെ കോപ്പിയടി കള്ളന്മാരെ പിടിക്കാന്‍ ലാത്തിയുമായി ഇറങ്ങി..

ഇപ്പോള്‍ അവിടെ ഭയങ്കര ലാത്തിച്ചാര്‍ജ് നടക്കുന്നു.(കള്ളന്മാര്‍ ഇനി അലിയെ സൂക്ഷിക്കുക!)

ഞാന്‍ പറഞ്ഞു വന്ന വിഷയത്തിലേക്ക് വരട്ടെ..

ബൂലോകത്തെ രണ്ടായിരത്തിപത്തിലെ സൂപ്പര്‍ സ്റ്റാര്‍ (സത്യമായിട്ടും സുഖിപ്പിച്ചതല്ല കെട്ടോ)

കൂട്ടുകാരന്‍ ഹംസയുടെ ബ്ലോഗ്ഗില്‍ ഒരു കമന്റ് കണ്ടു..ഒരു നവ ബ്ലോഗ്ഗര്‍ ഉപദേശം ചോദിച്ചിരിക്കുന്നു..

ഹംസ അതിനു നല്ല പക്വതയാര്‍ന്ന മറുപടി നല്‍കുകയും ചെയ്തു..(ഇതാണു സത്യത്തില്‍ എന്നെ കിടത്തി ചിന്തിപ്പിച്ചത്!)

കമന്റിനു വേണ്ടി മുറവിളികൂട്ടുന്നവര്‍ നല്ല രചനകളുമായി ആദ്യം ബ്ലോഗ്ഗില്‍ സജീവമാകുകയാണു വേണ്‍ടത് .

(ബെര്‍ളിയും വിശാലമസ്കന്‍ ചേട്ടനും ഒക്കെ തിരക്കിലായതിനാല്‍ ഈ രഹസ്യം വെളിപ്പെടുത്താന്‍ അവര്‍ എന്നെയാണു ഏല്പ്പിച്ചത്!.)

അതിനുള്ള ഒരു മികച്ച ഉദാഹരനമാണു കണ്ണൂരാന്‍.

ഈയ്യിടെ മാത്രം ബ്ലോഗ്ഗില്‍ പ്രത്യക്ഷപ്പെട്ട കണ്ണൂരാന്‍ എന്ന ബ്ലോഗ്ഗര്‍ വളരെ പെട്ടന്ന് തന്നെ പേരെടുത്തതിനു പിന്നില്‍ ആ ബ്ലോഗ്ഗര്‍ ബുദ്ധിപൂര്‍‌വ്വം നടത്തിയ തയ്യാറെടുപ്പ് തന്നെയാണു..ബ്ലോഗ്ഗിന്റെ അറ്റമില്ലാ ലോകത്തിലൂടെ നല്ലൊരു യാത്ര നടത്തി കാര്യങ്ങളുടെ കിടപ്പ് വശം മനസ്സിലാക്കി എഴുതിയ രചന നല്ലവണ്ണം കാച്ചിക്കുറുക്കി പതം വരുത്തി സകല ബ്ലോഗ്ഗിലും കേറി വരവറിയിച്ചിട്ടാണു പുള്ളി ആദ്യത്തെ പോസ്റ്റിട്ടതു തന്നെ.

ആദ്യ പോസ്റ്റിന് കിട്ടിയ വമ്പിച്ച സ്വീകാര്യത പക്ഷേ അടുത്ത പോസ്റ്റ് പെട്ടന്ന് തട്ടിക്കൂട്ടാനുള്ള വ്യഗ്രതയിലേക്ക് കണ്ണൂരാനെ എത്തിച്ചില്ല എന്നതും ശ്രദ്ധേയമാണു.

തുടര്‍ന്നു സമയമെടുത്ത് തന്നെ തയ്യാറാക്കിയ അടുത്ത പോസ്റ്റും മികച്ച നിലവാരം പുലര്‍ത്തി..

ഇപ്പോള്‍ ചുരുങ്ങിയ കാലത്തിനകത്ത് പോസ്റ്റ് ചെയ്ത നാലോളം പോസ്റ്റുകള്‍ക്ക് മാത്രം

കൊട്ടക്കണക്കിനു കമന്റും ഒരു പെട്ടി ഫോല്ലോവേഴ്സിനേയും കണ്ണൂരാന്‍ നേടിയെങ്കില്‍ അത് ആ ബ്ലോഗ്ഗറുടെ മിടുക്ക് തന്നെയെന്ന് നാം സമ്മതിച്ചേ തീരൂ.

പുതിയ ബ്ലോഗ്ഗേഴ്സ് പരമാവധി തങ്ങളുടെ രചനകള്‍ മികച്ചതാക്കുവാന്‍ ശ്രദ്ധിക്കുക.രചനകളുടെ എണ്ണത്തിലല്ല കാര്യം മറിച്ച് ഗുണത്തിലാനെന്നത് പലരും മറക്കുന്ന പോലെ തോന്നുന്നു.ബ്ലോഗ് അഗ്രിഗേറ്ററില്‍ രജിസ്റ്റര്‍ ചെയ്യുക, മറ്റുബ്ലോഗ്ഗേഴിന്റെ പോസ്റ്റുകളില്‍ കമന്റ് എഴുതുക,മാന്യതയും സഭ്യതയും പാലിക്കുക,എല്ലാ വിഷയത്തിലും കേറി മേയാതെ (ഞാന്‍ ചെയ്യുന്ന പോലെ)അവനവന്റെ കയ്യില്‍ ഒതുങ്ങും എന്ന് തോന്നുന്നതു മാത്രം കൈകാര്യം ചെയ്യുക, ഭാഷ സരസവും ആകര്‍ഷണീയവുമാക്കുക ,അക്ഷരതെറ്റുകള്‍ സൂക്ഷിക്കുക, മറുപടി കമന്റ് കൊടുക്കുക,

കമന്റ് എഴുതുക എന്നതും ഒരു കല തന്നെയാണു എന്നത് മനസ്സിലാക്കി കമന്റില്‍ പോലും ഭാഷാ വശ്യതയും സാഹിത്യ ഭംഗിയും വരുത്തുവാന്‍ ശ്രദ്ധിക്കുക തുടങ്ങി ഒരു പാടുകാര്യങ്ങള്‍ ശ്രദ്ധിച്ചാല്‍ നമ്മുടെ ബ്ലോഗ്ഗിലും ആളനക്കം ഉണ്ടാവും..രചന നല്ലതെങ്കില്‍ കമന്റും ഫോല്ലോവേഴ്സുമൊക്കെ പതിയെ പതിയെ

വന്നുകൊള്ളും.

"ദ ബ്ലോഗ്ഗ്" എന്ന പോസ്റ്റില്‍ പുതിയ ബ്ലോഗ്ഗേസ്ഴ്സിനുവേണ്ടി നമ്മുടെ മെഗാസ്റ്റാര്‍ ഒരു കമന്റ് ഇട്ടിട്ടുണ്ട്..

എന്റെ ഓര്‍മ്മ ശരിയാണങ്കില്‍ അതിങ്ങനെയാണു..

"കീബോര്‍ഡില്‍ നാലക്ഷരം റ്റൈപ്പ് ചെയ്ത്

ബ്ലോഗ്ഗറിലോ വേഡ് പ്രസ്സിലോ ഒരു ടെമ്പ്ലേറ്റിന്റെ സഹായത്തോടെ തട്ടിക്കൂട്ടിയുണ്ടാക്കുന്നതല്ല ബ്ലോഗ്ഗ്..

എണ്ണിയാലൊടുങ്ങാത്ത കമന്റ്സും ഫോല്ലോവേഴ്സും വേണമെങ്കില്‍

ആദ്യം ബ്ലോഗ്ഗെന്തന്നറിയണം..ബ്ലോഗ്ഗിങ്ങെന്തെന്നറിയണം..

ആയിരവും രണ്ടായിരവും ഫോല്ലോവേഴുള്ള ബെര്‍ളിമാരുടെയും വിശാലമനസ്ക്കന്മാരുടേയും ബ്ലോഗ്ഗല്ല..

മറിച്ച് ഊണും ഉറക്കവുമൊഴിച്ച് എന്തെങ്കിലും എഴുതി ബ്ലോഗ്ഗില്‍ പോസ്റ്റിയിട്ട്

കമന്റ് വരുന്നതും കാത്ത് എല്‍ സീ ഡി സ്ക്രീനില്‍ കണ്ണും നട്ടിരിക്കുന്ന പാവപ്പെട്ടവന്റെ ബ്ലോഗ്ഗ്..

ഒരു പോസ്റ്റുമിടാതെ എനിക്ക് കമന്റ് തരൂ ..എനിക്ക് കമന്റ് തരൂ

എന്ന് നിലവിളിക്കുന്ന വിവരദോഷിയുടെ ബ്ലോഗ്ഗ്.. .

നേരേ ചൊവ്വേ മലയാളമെഴുതാനറിയാത്തവന്റെ ഭാഷാപാണ്ഡിത്യം വിളമ്പുന്ന ബ്ലോഗ്ഗ്..

നീയിപ്പോ കമന്റ് ചെയ്യാതെ പോകാന്‍ തുനിഞ്ഞില്ലേ പാവം ഈ ലേഖകന്റെ ബ്ലോഗ്ഗ്..

ഇതൊക്കെ മനസ്സിലാക്കി ബ്ലോഗ്ഗില്‍ ഒരു പുലിയാവനമെന്നുണ്ടങ്കില്‍

അതിനുള്ള കോപ്പുണ്‍ടാവണം നിന്റെ കയ്യില്‍..

കോമണ്‍സെന്‍സുണ്ടാവണം നിന്റെ തലയില്‍..

നൗ..യൂ ഗെറ്റ് ലോസ്റ്റ്!

((പോയി നല്ലൊരു പോസ്റ്റ് തട്ടിക്കൂട്ടാന്‍ നോക്കട ചെക്കാ!))

ഒപ്പം പ്രിയ വായനക്കാരോടും ഒരു വാക്ക്..

പ്രിയ വായനക്കാരേ..

നിങ്ങള്‍ ചെറുതായി കോറിയിട്ടു പോവുന്ന ഒരു ചെറിയ കമന്റിനു ഒരു ബ്ലോഗ്ഗറുടെ സര്‍ഗ്ഗചേതനക്ക് നിങ്ങള്‍ക്കു നഷ്ടമില്ലാത്ത വലിയ ഉപകാരം തന്നെ ചെയ്യാന്‍ കഴിയുമെന്നോര്‍ക്കുക..

വായിക്കാന്‍ കൊള്ളാവുന്നതെങ്കില്‍ ..

തീരെ മോശമല്ലാത്തതെങ്കില്‍

ഒരു സ്മൈലി എങ്കിലും ഇട്ടേച്ച് പോവുക..

കാരണം നിങ്ങള്‍ കൈപിടിച്ച് കരക്കുകയറ്റുന്ന ബ്ലോഗ്ഗര്‍ ഒരു പക്ഷേ നാളെ ഒരു എം.ടിയോ വിജയനോ പത്മനാഭനോ

സേതുവോ സക്കറിയയോ പുനത്തില്‍ കുഞ്ഞബ്ദുള്ളയോ അറ്റ്ലീസ്റ്റ് ഒരു നൗഷാദ് അകമ്പാടമോ എങ്കിലും ആയിത്തീരില്ലെന്നാരു കണ്ടു?!

((പ്രസിദ്ധരും ശ്രദ്ധേയരുമായ ഒട്ടനവധി ബ്ലോഗ്ഗര്‍ സുഹൃത്തുക്കളെ പരാമര്‍ശിക്കാതെ പോയിട്ടുണ്‍ട്.

പരിമിതികള്‍ മനസ്സിലാക്കി മാന്യ സുഹൃത്തുക്കളും വായനക്കാരും ക്ഷമിക്കുക.))

--------------------------------------------------------------------------------------------------------------------------