"പുതു ബ്ലോഗ്ഗേഴ്സിനുള്ള കമന്റുകള്‍ മരുന്നാവണം.. വിഷമാവരുത്!"

"എന്റെ വര"യിലെ കഴിഞ്ഞ പോസ്റ്റില്‍ ചില സുഹൃത്തുക്കളുടെ ബ്ലോഗ്ഗുകളെക്കുറിച്ചും ചില ബ്ലോഗ്ഗര്‍മാരുടെ കമന്റ് ശൈലിയെക്കുറിച്ചും ഞാന്‍ എഴുതിയത് അവരെ സുഖിപ്പിക്കുക എന്ന ഉദ്ദേശ്യം വെച്ചാണെന്നു ചില ബ്ലോഗ്ഗര്‍ സ്നേഹിതന്മാര്‍ പരാതി പറഞ്ഞിരിക്കുന്നു.

ആദ്യമേ പറയട്ടെ..

ഞാന്‍ പേരെടുത്തെഴുതിയതില്‍ ഒരാളെ പോലും എനിക്ക് വ്യക്തിപരമായി പരിചയമില്ല എന്നു മാത്രമല്ല ഒന്നോരണ്ടോ പേര്‍ക്ക് ഒന്നു രണ്ടു ഈ മെയില്‍ അയച്ചിരുന്നു എന്നതൊഴിച്ചാല്‍ അവരുമായി ഒരു ഓണ്‍ലൈന്‍ ബന്ധം പോലും എനിക്കില്ല..

അങ്ങനെയുള്ള ഞാന്‍ എന്തിന്റെ പേരിലാണു അവരെ സുഖിപ്പിക്കാന്‍ ഒരു പോസ്റ്റ് എഴുതേണ്ടത് എന്ന് എനിക്ക് മനസ്സിലാവുന്നില്ല.

( അജ്ഞാത സുഹൃത്തേ.. ബ്ലോഗ്ഗും ഇന്റര്‍നെറ്റും കമ്പ്യൂട്ടറും പ്രചാരത്തിലാവും മുന്‍പേ വരയും എഴുത്തും ഒപ്പം കൊണ്ട് നടക്കുന്ന ഒരാളാണു ഞാന്‍.സോപ്പിട്ട് എഴുതി അവര്‍ നല്‍കുന്ന കമന്റിന്റെ ഉത്തേജനം വേണ്ട എന്റെ വരക്കും എഴുത്തിനും. നമ്മള്‍ മലയാളികള്‍ ഇത്ര സങ്കുചിത മനസ്ക്കരാകണൊ..

ഒരു നല്ല വാക്ക് പറയുമ്പോഴേക്കും.....!)

ഓരോ ബ്ലോഗ്ഗര്‍ക്കും ബ്ലോഗ്ഗിങ്ങിലൂടെ ഉരുത്തിരിഞ്ഞ് വരുന്ന ഒരു സൗഹൃദ വലയം ഉണ്ടാവും..

ആയിരക്കണക്കിനു ബ്ലോഗ്ഗുകളുള്ള മലയാളത്തില്‍ എന്റെ ചുറ്റുവട്ടത്തിലേ ബ്ലോഗ്ഗുകളില്‍ കണ്ട കാഴ്ച മാത്രമേ ഞാന്‍ അപഗ്രഥിച്ചിട്ടുള്ളൂ..

പരിചയകമന്റുകളുടെ ശൈലിയേ ഞാന്‍ എടുത്ത് പറഞ്ഞിട്ടുള്ളൂ..

ധാരാളം കമന്റുകള്‍ ലഭിക്കുന്ന ബ്ലോഗ്ഗ് മികച്ചതായിരിക്കുമെന്ന് ഞാന്‍ എവിടെയും പറഞ്ഞിട്ടില്ല.

ഹംസയെ ഞാന്‍ സൂപ്പര്‍സ്റ്റാര്‍ എന്നെഴുതിയത് അല്പ്പം കടന്നു പോയെങ്കില്‍ ക്ഷമിക്കുക.

ഇരുന്നൂറോളം പ്രൊഫൈല്‍ പരിശോധിച്ചതില്‍ നിന്നും ആദ്യ പോസ്റ്റിട്ട് ഇതുവരേയുള്ള കാലഘട്ടത്തില്‍ ഏറ്റവും ചുരുങ്ങിയ കാലം കൊണ്ട് ഏറ്റവും കൂടുതല്‍ പോപ്പുലാരിറ്റി നേടി ഏറ്റവും കൂടുതല്‍ ഫോല്ലോവേഴ്സിനെ സ്വന്തമാക്കിയ ആ ബ്ലോഗ്ഗര്‍ക്ക് ഞാന്‍ നല്‍കിയ വിശേഷണം തെറ്റിപ്പോയെന്ന് എനിക്ക് ഇതുവരെ തോന്നിയിട്ടില്ല.. മറിച്ച് അത്തരത്തില്‍ എടുത്ത് കാണിക്കാവുന്ന മറ്റു ബ്ലോഗ്ഗര്‍മാരുണ്ടെങ്കില്‍ തീര്‍ച്ചയായും ഞാന്‍ അവരേയും ഇവിടെ അവതരിപ്പിക്കുമായിരുന്നു.ഇനി ഉണ്ടെങ്കില്‍ ദയവായി അറിയിക്കുക.

കമന്റ് എഴുതുക അല്ലെങ്കില്‍ ലഭിക്കുക എന്നത് ഒരു ബ്ലോഗ്ഗറെ സംബന്ധിച്ച് വളരെ പ്രധാനം തന്നെയാണു.

വായിക്കാനാളില്ലെങ്കില്‍ ഒരു പ്രസിദ്ധീകരണം മുന്നോട്ടു കൊണ്ടു പോവാന്‍ കഴിയില്ല എന്നതു പോലെ തന്നെ

എത്ര നല്ല രചനകള്‍ ഉള്ള ഒരു ബ്ലോഗ്ഗാണെങ്കിലും അതിലെ കമന്റ് കോളത്തിനു ജീവനുണ്ടങ്കിലേ ആ ബ്ലോഗ്ഗര്‍ തുടര്‍ന്നും നല്ല രചനകള്‍ പോസ്റ്റു ചെയ്യുകയുള്ളൂ...നല്ല വായനക്കാരെ ലഭിക്കുന്ന ഒരു ബ്ലോഗ്ഗര്‍ തന്റെ സര്‍ഗ്ഗശേഷി അധിക കാലം അടച്ചുവെക്കില്ല.

ചില രചനകള്‍ക്ക് കടുത്ത വിമര്‍ശനം ഉയരുമ്പോള്‍ പല ബ്ലോഗ്ഗര്‍മാരും അസ്വസ്ഥരാവാറുണ്ട്.

അപ്പോള്‍ വായനക്കാരനു നേരെ ചീറ്റിയടുക്കുന്ന ഒരു കൂട്ടരുമുണ്ട്.

എന്റെ രചനകളിലേക്ക് ഞാനാരേയും ക്ഷണിച്ചില്ലല്ലോ..എന്നു പറയുന്നത് ശുദ്ധ വങ്കത്തരമല്ലേ..

ഒരു പുസ്തകം മാര്‍ക്കറ്റില്‍ ഇറക്കുക എന്നതു പോലെ തന്നെയാണു ബ്ലോഗ്ഗില്‍ അതു പ്രസിദ്ധീകരിക്കുക എന്നതും. വായനക്കാരനെ ആവശ്യമില്ലെങ്കില്‍ അത് ഡയറിയില്‍ എഴുതി അലമാരിയില്‍ വച്ചാല്‍ പോരെ?

എന്തിനത് പബ്ലിഷ് ചെയ്യണം..!

ഇഷടപ്പെട്ട രചനകള്‍ക്ക് കമന്റ് കൊടുക്കുക എന്നത് ഒരേ സമയം ഒരു ബ്ലോഗ്ഗര്‍ക്ക് നല്‍കുന്ന സഹായ ഹസ്തവും അതേ പോലെ സ്വന്തം ശൈലിയും നിരീക്ഷണ പാടവും വാര്‍ത്തെടുക്കുവാനുള്ള ഒരു സന്ദര്‍ഭവുമാണു.

മറ്റുള്ളവര്‍ എങ്ങനെ ആ രചനയെ സമീപിച്ചു എന്നതും ഇനിയെങ്ങനെ മറ്റൊരു കാഴ്ച്ചപ്പാടിലൂടെ അതിനെ വിലയിരുത്താം എന്നതുമൊക്കെ നാം കൈവരിക്കേണ്ട ചില രചനാ ശീലങ്ങളാണു.

പുതിയ ബ്ലോഗ്ഗര്‍മാര്‍ക്ക് ഒരു സ്മൈലിയില്‍ ഒതുക്കാതെ വിഷയം കൂടുതല്‍ അപഗ്രഥിച്ച് എഴുതുവാനും മുളപൊട്ടിവരുന്ന പുതു ആശയങ്ങളിലൂടെ മറ്റുവായനക്കാര്‍ സ്വന്തം ബ്ലോഗ്ഗിലേക്ക് സ്വമേധയാ കടന്നു വരുവാനുമുള്ള വഴിയൊരുക്കുകയും ചെയ്യുന്നു.

കമന്റ് എന്നത് ഒരു കലതന്നെയാണെന്നു നാം തിരിച്ചറിയണം.

മറുപടിയിലൂടെ നല്‍കുന്ന വാക്കുകള്‍ പലപ്പോഴും ചെത്തിമിനുക്കി അതിരുകള്‍ക്കകത്ത് ഭംഗിയില്‍ കോരിയിട്ട്

നാം ബോക്സ് നിറക്കുന്ന പ്രക്രിയ കമന്റ് ഒരു കൊടുക്കല്‍ വാങ്ങലിനപ്പുറത്ത്,ഒരു സുഖിപ്പിക്കലിനപ്പുറത്ത്

സൗഹൃദത്തിന്റെ..

സര്‍ഗ്ഗ വൈഭവത്തിന്റെ മറ്റൊരു തലം നമുക്കുമുന്നില്‍ തുറന്ന് തരുന്നു എന്ന് നാം അറിയണം

എഴുതിത്തെളിഞ്ഞവരല്ല മറിച്ച് എഴുതിത്തെളിയുന്നവരാണു മലയാളം ബൂലോകത്തിനെ സജീവമാക്കുന്നതെന്ന കാര്യം മറക്കാതിരിക്കുക..അതുകൊണ്ട് തന്നെ കമന്റുകള്‍ അവര്‍ക്ക് ഉത്തേജനം നല്‍കുന്നതോ മരുന്ന് പോലെ പ്രതിവിധി ആകുന്നതോ ആയിരിക്കുക എന്നതല്ലാതെ അത് വിഷത്തിന്റെ ഫലം ചെയ്യരുത് എന്ന് ഞാനാഗ്രഹിക്കുന്നു.