എനിക്കില്ലാത്ത 'അമ്മ ദിനം'

----

ഇന്ന് അമ്മ ദിനം.

പെറ്റമ്മയുടെ ഓര്‍മ്മകളെ തിരഞ്ഞു പിടിക്കാന്‍

കലണ്ടര്‍ സമ്മാനിച്ച ഒരു ദിനം..

----

മുലകുടിച്ച മാറിന്റെ ഇളം ചൂട് മറന്നു പോയവര്‍ക്ക്..

മാറോട് ചേര്‍ത്ത് ഉമ്മവെച്ച്

താരാട്ട് പാടിയുറക്കുമ്പോള്‍

അമ്മയെന്തിനാ കരയുന്നതെന്ന് ചോദിച്ച

നിഷ്ക്കളങ്ക ബാല്ല്യം മറന്നു പോയവര്‍ക്ക്..

----

തന്റെ വിശപ്പകറ്റാനമ്മ

ഒരുപാട് വിശന്നെന്ന്

തിരിച്ചറിഞ്ഞ കൗമാരം

മറന്നു പോയവര്‍ക്ക്

ഓര്‍ക്കാനൊരു ദിനം!

----

ഒടുവിലെന്നോ ജരാനര ബാധിച്ചപ്പോള്‍

ഇരുളടഞ്ഞ ഒരു മുറി സമ്മാനിച്ച്

അവിടെയൊതുങ്ങിക്കിടന്നൂടേയെന്ന്

അലമുറയിട്ടവര്‍ക്ക്..

----

വൃദ്ധ സദനത്തിന്റെ ആപ്പീസുമുറിയില്‍ നിന്നും

ചകിതമല്ലാത്ത മനസ്സുമായി പടിയിറങ്ങിയവര്‍ക്ക്..

അമ്മയെക്കുറിച്ചോര്‍ക്കാന്‍ ഒരു ദിനം..

----

പക്ഷേ

എനിക്കങ്ങനെയൊരുദിനമില്ല..

കാരണം

എനിക്കെല്ലാദിനങ്ങളും

അമ്മ ദിനങ്ങളാണു..

------

---

-

-Great Depression photo "Migrant Mother" by Dorothea Lange.

-----

-----